Lohasblog.com

唔知點解，身邊總會有一兩個特別麻煩嘅朋友，往往令你招架不住。望望以下有無你朋友嘅影子，睇下點見招拆招啦！

1. 自私、貪小便宜

佢平時同朋友食飯最鐘意搶住碌卡俾錢儲分，但如果有優惠時又唔會同人分享，佢會話「嗱，我有張$10 coupon，咁我夾少$10。」斤斤計較，如果你俾少一毫子佢都會追返。

解決方案：其實錢銀嘅嘢計清楚係無可厚非，但如果朋友之間太計較亦容易產生hard feelings。遇着呢種利益行先嘅朋友，不妨私底下同其他朋友傾吓，set一啲rules，再喺佢面前提出，例如如果大家都想簽卡儲分，一於建議大家輪流簽卡，當大家都同意，在群眾壓力之下佢就唔敢say no。

2. 唔守時、無交帶

你約佢7點，7點半依舊無影，遲到當食生菜，有時仲會失驚無神甩底，你打俾佢嘅時候先話「我病咗／臨時有事嚟唔到」，完全唔顧你感受。

解決方案：一次半次當然唔緊要，但如果一直都有呢個情況，你就要反擊下，譬如遲到，甚至放飛機，當佢向你投訴時，你就講笑咁話「上次我等咗你成個鐘添啦！」，等佢自己檢討下。如果佢依舊無改善，覺得你只係講笑，你就要認真地同佢講，你好介意佢呢種行為，希望佢可以改善。

3. 八卦、煩人

有一種朋友最鍾意問長問短，務求知道你嘅一切，唔止煩擾，有時仲會問你一啲私人問題，好似幾錢人工、拍過幾多次拖之類，但無諗過唔係個個人都想將所有事同佢分享。

解決方案：首先要分清楚，佢係善意咁關心你定係純粹想八卦。如果佢只係善意嘅關懷過咗火，唔好每事答，例如佢狂問你返新工嘅細節，你就答佢一句「暫時都ok，無乜特別」，以免製造佢不停問落去嘅機會。如果你發現對方純粹係為咗八卦，可以直接ignore佢，等佢知難而退。

4. 刻薄、口沒遮攔

每次見面佢總忍唔住串你幾句，又或者唔覺意爆咗你嘅秘密俾大家知。

解 決方案：分清楚佢係有心定無意，如果係無心之失，而佢又經常係咁，你可以搵個大家單獨共處嘅時候同佢傾，俾佢知道佢之前嘅說話令你唔太開心，希望佢可以改 善。當然，如果佢係有惡意，有心針對你，即係唔當你係朋友，你亦都唔使同佢客氣，可以直情疏遠佢，等自己以後耳根清淨啲。

5. 公主病

有種朋友好麻煩，當正自己王子／公主，而你就係佢嘅奴隸。次次聚會總係大安旨意有人服侍佢，甚至有時當你係工人，要你幫佢拎嘢、買嘢（仲要數量唔少），絕對唔客氣。

解決方案：太過分嘅要求，例如要你去旅行時幫佢買一大箱麵，或者要你托朋友買10張演唱會飛，可以直接拒絕。朋友之間嘅地位係應該平等，你無必要俾佢勞役。

//